Сатыы киһи баран иһэрэ көстөр.

Кэпсээнньит. Былыыр-былыр айанньыт баран испит. Ол баран иһэн, сылгы төбөтүн саҕа көмүһү булан ылбыт.

Айанньыт. Дьол хараҕа суох. Балык ыамнаах, киһи күннээх диэн маны эттэхтэрэ. (Көмүһү сүгэн барар. Сотору сылайар, көлөһүнүн соттор). Һуу! Эт-тирии баранна, иҥсэм бэйэбинээҕэр улахан эбит. (Утары аттаах киһи кэлэр). Нөрүөн-нөргүй!

Аттаах киһи. Дорообо!

Айанньыт. Доҕоор, аккын атыылаа эрэ.

Аттаах киһи. Атыыһыт албыннаабатаҕына иһэ ыалдьар.

Айанньыт. Ат оннугар ат төбөтүн саҕа көмүһү биэриэм. (Аттаах киһи атастаһан барар). Көмүс харчы оннугар эттээх ат эрэмньилээх.

Кэпсээнньит. Ата айааһамматах буолан, айанньыппытын дэлби сылаппыт. (Утары оҕустаах киһи иһэрэ көстөр).

Айанньыт. Дорообо, доҕоор. Оҕускун акка атастаһыах эрэ.

Оҕустаах киһи. Тоҕо, доҕоор?

Айанньыт. Кырдьар – кырыыс, айааһамматах аты кыайан тутуо суохпун. (Оҕустаах киһи атастаһан барар). Тиэтэйбит сыарҕа сыыр анныгар хаалар, тиэтэйбэтэх сыарҕа сыыр үрдүгэр тахсар.

Кэпсээнньит. Оҕус олус бытааннык хаамар, айанньыт ыксыыр, оҕустан түһэр.

Айанньыт. Эчи, сыыллан түһэн, ситэри сатыы хаампыт ордук. (инньэ диирин кытары ынах сиэппит киһи иһэрэ көстөр). Доҕоор, ынаххын оҕуска атастаһыах эрэ.

Ынахтаах киһи. Тоҕо, доҕоор?

Айанньыт. Оҕуһу сиэтэ сылдьыахтааҕар, ынаҕы сиэппит быдан ордук. Өссө үүтүн ыан иһиэм. (Ынахтаах киһи атастаһан барар). Сатабыллаах саһыл саҕалаах буола түстүм буолбат дуо. Чэ, барыахха.

Кэпсээнньит. Ынаҕа өсөһөн, харыс да сири халбарыйбат.

Айанньыт. Айа да айа! Эт-тирии баранна. (Инньэ диирин кытары, тыһаҕастаах киһи иһэрэ көстөр). Доҕоор, тыһаҕаскын ынахха атастаһыах эрэ.

Тыһаҕастаах киһи. Тоҕо, доҕоор?

Айанньыт. Олус өһөс сүөһү, харыс да сири халбарыйбат.(Тыһаҕастаах киһи атастаһан барар). Хата, миэхэ дьол былыт быыһынан тыган ааста. Чэ, барыах.

Кэпсээнньит. Тыһаҕас уолугунан тыынан, уһугунан дугунан, оройунан оонньоон өсөһүн ааһан, өссө үргүүк, сүүрүүк эбит.

Айанньыт. Оо, муҥ маһы кэрийбэт-киһини кэрийэр диэн сөпкө да этэллэр. (Ньирэйдээх киһи ииһэрэ көстөр) Доҕоор, ньирэйгин тыһаҕаска атастаһыах эрэ.

Ньирэйдээх киһи. Тоҕо, доҕоор?

Айанньыт. Сорбун сордоото, ыла оҕус. (ньирэйдээх киһи атастаһан барар). Дьэ, сынньанар инибин.

Кэпсээнньит. Сыыһар сыыстааҕар элбэх, ньирэйбит, букатын киһибитин эрбэх үрдүгэр сэттэтэ эргиттэ.

Айанньыт. Кэбис, олох иэдэйииһикпин. (Утары сүгэлээх киһи иһэрэ көстөр). Доҕоор, сүгэҕин ньирэйгэ атастаһыах эрэ.

Сүгэлээх киһи. Тоҕо, доҕоор?

Айанньыт. Кырдьаҕас киһи олус сылайдым. (Сүгэлээх киһи атастаһан барар). Аата, абыраннахпын, дьэ холкутуйар инибин.

Кэпсээнньит. Сылдьар да сылаалаах, киһибит сүгэтин сүгэ сылдьарыттан сылайда. Айанньыт сүгэтин ыарырҕатара көстөр. Утары быһахтаах киһи иһэр).

Айанньыт. Доҕоор, быһаххын сүгэҕэ атастаһыах эрэ.

Быһахтаах киһи. Тоҕо, доҕоор?

Айанньыт. Олус сылайдым. Үтэһэм туолла, чабычаҕым таһымнаата. (Быһахтаах киһи атастаһан барар, быһаҕын этэрбэһигэр уктар).

Кэпсээнньит. Чараас иһигэр бүргэс баппат, сотору быһах атаҕын аалан сордуур. (Утары иннэлээх дьахтар иһэрэ көстөр).

Айанньыт. Доҕоор, иннэни быһахха атастаөыах эрэ.

Иннэлээх дьахтар. Тоҕо, доҕоор?

Айанньыт. Атахпын олус аалла, тулуйарбын аастым. (Иннэлээх дьахтар атастаһан барар). Таҥыннахха алдьаммат таҥас диэн суох, хата, абырахтанарбар иннэлэнним.

Кэпсээнньит. Айанньыппыт санаата туолан, сүргэтэ көтөҕүллэн, бэрт уһун сири хаампыт. Эмискэ, сүһүөхтээх бүдүрүйбэт буолбат, иҥнэн охтон түһэр. (Туран иһэн түөһүн харбанар-иннэтэ суох, көрдүүр).

Айанньыт. Оо, дьэ! Аны сүппүт-көстүбэт, тимирбит-күөрэйбэт буоллаҕа. Ыт баһа көмүс кытахтан төкүнүйбүтүгэр дылы буоламмын. (Төбөтүн туттан олорон хаалар).