ЭРИЭППЭ

Музыка тыаһыыр. Дьиэ турар. Сахалыы таҥастаах эмээхсиннээх оҕонньор олороллор.

Оҕонньор баяннаах, эмээхсин баайар.

Кэпсээнньит. Олох олоруу көнө хонууну туорааһын буолбатах. Былыр былыр эмээхсиннээх оҕонньор сүүс сүүстэриттэн өйөһөн өйдөһөн олорбуттара эбитэ үһү. Ас халлаантан түспэт, кураан дьыл буолан, оҕонньордоох эмээхсин, тугу хаһаанан кыһыны туоруулларын толкуйдууллар..

Оҕонньор. Сүгэ кыайбатаҕын, сүбэ кыайар. Эмээхсин, сүбэлэһиэх эрэ.

Эмээхсин. Көтөр өҥүнэн, киһи өйүнэн, толкуйдаа.

Оҕонньор. Мөҕүллүөх кэриэтэ сүбэлээбит ордук.

Эмээхсин. Чыычаах көтөрүнэн, киһи оҥорорунан, эриэппэтэ олорт.

Оҕонньор. Кырдьык даҕаны, төҥкөйдөххүнэ эрэ, тэллэй иһиккэ киирэр, отонноотоххо оҥоойук туолар. Бараммын олордуум. (Буор хаһан, сиэмэ олордор. Уу иһэр). Токко сыа да сымсах, ааска уу да минньигэс. (Дьиэҕэ киирэллэр)

Кэпсээнньит. Эрдэ турбут чыычаах тумсун соттор, хойут турбут чыычаах хараҕын хастар. Оҕонньор эрдэ туран эриэппэтин көрө барар. (Эриэппэ оҕо киирэн олорор).

Оҕонньор. Ок-сиэ, хара харах көрбөтөх, хаптаҕай кулгаах истибэтэх улахан эриэппэтэ үүммүт дии. Тугун бэрдэй.

Кэпсээнньит. Оҕонньор тардыбыт тардыбыт, кыайан туура тардыбатах.

Оҕонньор. Кыайыа суохпун дуу? Эмээхсиммин ыҥырыым. Таах да хопто курдук кыраттан айдааны тардыма диэҕэ (эмээхсин экэлэр).

Эмээхсин. Тоҕо миигин ыҥырбатыҥ? Биир бэйэҥ биэс буолуоҥ суоҕа.

Кэпсээнньит. Эмээхсин оҕонньортон, оҕонньор эриэппэттэн, тардыбыттар тардыбыттар, кыайан туура тардыбатахтар.

Эмээхсин. Кыайымаары гынныбыт. Уулаах балык быстыбат, дьонноох киһи тутайбат. Сиэммин ыҥырыым. Сиэн кыыс, сиэн кыыс, кэл, кэл, көмөлөс.

Кэпсээнньит. Сиэн кыыс эмээхсинтэн, эмээхсин оҕонньортон, оҕонньор эриэппэттэн, тардыбыттар тардыбыттар, кыайан туура тардыбатахтар.

Сиэн кыыс. Кыайымаары гынныбыт. Ат сүүрдэҕинэ, ыт хаалбат. Ыппын ыҥырыым. Суолдьут, Суолдьут, кэл, кэл, көмөлөс. (Ыт сүүрэн киирэр)

Кэпсээнньит. Ыт сиэн кыыстан, сиэн кыыс эмээхсинтэн, эмээхсин оҕонньортон, оҕонньор эриэппэттэн, тардыбыттар тардыбыттар, кыайан туура тардыбатахтар.

Ыт. Кыайымаары гынныбыт. Кыра да күүс улахан көдьүүс. Куосканы ыҥырыым. Чох харах, Чорх Харах, кэл, кэл, көмөлөс.

Кэпсээнньит. Куоска ыттан, ыт сиэн кыыстан, сиэн кыыс эмээхсинтэн, эмээхсин оҕонньортон, оҕонньор эриэппэттэн, тардыбыттар тардыбыттар, кыайан туура тардыбатахтар.

Куоска. Кыайымаары гынныбыт. Кутуйаҕы ыҥырарым дуу, ыҥырбатым дуу? (Кутуйах сүүрэн киирэр).

Кутуйах. Сэнээбиккиттэн сэттэҕин ылаайаҕыҥ. Ыҥырыа кырабын диэн ыарахан үлэттэн толлубат.

Кэпсээнньит. Кутуйах куоскаттан, куоска ыттан, ыт сиэн кыыстан, сиэн кыыс эмээхсинтэн, эмээхсин оҕонньортон, оҕонньор эриэппэттэн, тардыбыттар тардыбыттар, туура тардан ылбыттар.

Бары. Иэхэйбиин!

Эриэппэни тула оһуокайдыыллар.