МАХТАЛА СУОХ

Сааскы кэм. Бөрө сытара көстөр.

Кэпсээнньит. Өрүс долгуннаах, олох очурдаах. Уол оҕо биир күн - ат өрөҕөтүгэр, биир күн - ат уорҕатыгар дэнэринии, бөрө эмискэ ыалдьыбыт. Кыайан бултуур кыаҕа суох буолбут. Хас да күн аһаабакка,аччыктаан, сыккырыыр тыына эрэ хаалбыт.

Бөрө. Аччыктаатахха ас эрэ амтаннаах буолар, саатар тугу эмэ сиэбит киһи. Силбин быһа ыйыста сытар буоллаҕым дии...

Кэпсээнньит. Субу кэмҥэ эһэ, уһун уутуттан уһуктан, сааскы киһи салбаммытынан дэнэринии, бултуу сылдьыбыт. Бу сылдьан, Бөрө от илии, от атах буолан сытарын көрөр.

Эһэ. Хайа, бу быраатым,т уох айылаахха түбэстиҥ? (Бөрөнү таптайан көрөр, бөрө ынчыктыыр эрэ). Оо, дьэ, киһи сырыттаҕына сырыттым диир ээ. Буорайаахтаабыккын. Айыы киһитэ аһыныгас, күн киһитэ көмүскэс, аһаттахха сатаныыһы. Мэ, маны сиэ. (Моҕотойу туттарар). Сап саҕаттан салҕанан үтүө буолуоҥ.

Кэпсээнньит. Айахтан илии муммат, Бөрө моҕотойу аҕыйахта хабыалаан кэбиспит. Махтал, баһыыба суох буолбут. (Эһэ бултуу барар).

Бөрө. Булдун эһэ кымырдаҕастаан сиэбитигэр дылы аҕалар, кэччэйэр быһылаах. Тимир илиилээх, кытаҕас ытыстаах буолан биэрдэ.

Кэпсээнньит. Эһэ эп-эмис куобаҕы, туртаһы аҕалар. Бөрө сиэн кэбиһэр. Токко сыа да сымсах, астымматах көрүҥнээх.

Бөрө. Ыран охтоору сылдьар сордооҕу аҕалбыккын.

Эһэ. Аһы сиримэ, ас ааттаһыа суоҕа.

Кэпсээнньит. Хас да хонук ааспыт. Бөрө үтүөрэн, тыаҕа дьаарбайа сылдьан, сүһүөхтээх бүдүрүйбэт буолбат, эһэ сохсоҕо баттата сытарыгар түбэһэр. Эһэ бөрөнү көрөн үөрэр.

Эһэ. Атаһыам, көмөлөһүүй! Күн туллара, күһэҥэ быстара кэллэ. Күн буол, ый буол!

Бөрө. Убайыам, көмөлөһөр кыаҕым суох. Ити үлүгэрдээх бэрэбинэлэри хайа бодобунан көтөҕүөхпүнүй?

Эһэ. Быалары быһыта кэбийтэлээ.

Бөрө. Суох! Суох! Эйигин кытары бодьуустаһар солом суох. Быраһаай. Мин туспунан куһаҕаны санаайаҕын!

Эһэ. Махтала суох хара сордоох! Аска аллаах, үлэҕэ көлөөх, мэ диэтэххэ мичик гынар, аҕал диэтэххэ антах хайыһар хара албын, далай акаары эбиккин!

Кэпсээнньит. Эһэ эрэйдээх, кыһыытыттан-абатыттан иһигэр былас муостаах киирэн, сохсотун сүкпүтүнэн туран кэлбит. Онтон ыла эһэлээх бөрө эйэлэрэ арахсыбыт. Бөрө эһэни көрдөҕүнэ, ороҕун булбатах кутуйах курдук куотар, ырааҕынан сылдьар буолбут.