КИҺИРГЭС КУОБАХЧААН

Кэпсээнньит. Былыыр-былыр куруҥ тыаҕа олорбута эбитэ үһү куобахчаан. Кыһыл тылынан оонньоон, этэн-тыынан дьэргэстэнэн дьэ, куобах да куобах!

Куобах. Кэлиҥ, истиҥ, сэргэҕэлээҥ! Мин саамай күүстээхпин. Сып-сытыы тиистэрдээхпин, кэтит, күүстээх баппаҕайдаахпын, уһун да уһун бытыктаахпын! Муора миэхэ тобукпунан, халлаан миэхэ хабарҕабынан (көрдөрөр). Кимтэн да куттаммаппын!

1-кы Куобах. Көбүөхтүүрүн аанньа күөх киһиргэс!

2-с Куобах. Киһиргээҥҥин кирсиҥ быстаарай!

3-с Куобах. Хайҕанабын диэн хараайаҕын!

Куобахтар. Тураах, тураах, куобахчааммыт эмиэ тылынан кынаттанан эрэр.

Тураах. Дьэ, мин кинини кэһэтиэм, сэттэтин ылыам.

Кэпсээнньит. Куобахчааммыт аччыктаан, аһыыр сиргэ сүүрэн кэлбитэ, тураах кэтэһэн олорор эбит.

Тураах. Нохоо, тоҕо киһиргиигин. Эйиэхэ да эт, истиэнэҕэ да эт-син биир!

Уутааҕар чуумпутук, оттооҕор намыһахтык сырыт диибин буолбат дуо! (Куобаҕы оройго тоҥсуйар). Өйдөөтүҥ дуо. Кыһыл тылгынан кыырбат буол!

Куобах. Өйдөөтүм, өйдөөтүм. Аны хаһан да киһиргиэм суоҕа, убайыам.

Көрдөһөбүн-ааттаһабын, тылбын биэрэбин.

Кэпсээнньит. Арай биирдэ тураах, хаар устун күүлэйдээри, тииттэн сиргэ түспүт. Өлүү түбэлтэлээх, сор болдьохтоох, хантан да кэлбиттэрэ биллибэт, ыттар буола түспүттэр, турааҕы тутан ылбыттар.

Тураах. Даах, даах! Көмөлөһүҥ! Күн буолуҥ, ый буолуҥ!

Кэпсээнньит. Куобах, ону истэн, сүүрэн тахсыбыт. Ыттар куобаҕы көрөн, иҥсэлэрэ бэйэлэринээҕэр улахан, турааҕы быраҕан баран, куобаҕы эккирэтэллэр. Куобах - кус быһый, ат бөҕө кинилэргэ туттаран да бэрт, куотан хаалбыт.(Тураах тииккэ көтөн тахсар).

Тураах. Даах-дарараах! Биһиги куобахпыт тылын тыалга бырахпат, доҕорун алдьархайга хаалларбат. Хорсун-хоодуот эбит!