ДЬИЭ-ДЬИЭЧЭЭН

Сайын. Хонууга кутуйах сүүрэ сылдьара көстөр. Дьиэ турарын көрөр. Үөрэр.

Кутуйах. Иэхэйбиин! Сылдьыбыт сыыһы, көрдөөбүт көһүйэ көмүһү булар диэн маны этэн эрдэхтэрэ. Быар куустан олорбутум буоллар, дьиэ булбутым чахчы. (Тоҥсуйар). Дьиэ-дьиэчээн, эйиэхэ ким олорор?

Кэпсээнньит. Ким да саҥарбат. Кутуйах дьиэҕэ киирэн дьиэлэммит.

Кутуйах. Хайа бэйэлээх дьиэтин быраҕан барбытай?

Кэпсээнньит. Бу олордоҕуна, бах-бах баҕачаан ыстаҥалаан кэлэр.

Баҕа. Дьиэ-дьиэчээн, эйиэхэ ким олорор?

Кутуйах. Мин Хороонньут Кутуйахпын. Эн кимҥиний?

Баҕа. Мин Бах-бах баҕабын. Миигин дьукаах ыл. Күөх оту тосту үктээбэт үтүө майгылаахпын.

Кутуйах. Чэ, буоллун. Үтүө тыл бэлиэ, киир.

Кэпсээнньит. Бу курдук олордохторуна, куобах сүүрэн кэлэр.

Куобах. Дьиэ-дьиэчээн, эйиэх ким олорор?

Кыыллар. Мин Хороонньут Кутуйахпын, мин бах-бах Баҕабын. Онтон эн кимҥиний?

Куобах. Мин Куттамсах куобахчааммын. Миигин, бука диэн, дьукаах ылыҥ. Уутааҕар чуумпутук, оттооҕор намыһахтык олоруом.

Кыыллар. Киир, киир. Аччыгы аһатар, тоҥмуту ириэрэр, ыалдьыты маанылыыр буоллахпыт дии. Үһүөн өссө көрдөөх буолуо.

Кэпсээнньит. Бу курдук олордохторуна, саһыл ньылбыйан кэлэр.

Саһыл. Дьиэ-дьиэчээн, эйиэхэ ким олорор?

Кыыллар. Мин Хороонньут Кутуйахпын, мин бах-бах Баҕабын, мин Куттамсах Куобахчааммын. Онтон эн кимҥиний?

Саһыл. Мин Саһылчааммын. Албан аат, суон сурах түргэн кынаттаах, бу дьиэ туһунан истэ охсоммун тиийэн кэллим. Миигин эмиэ дьукаах ылыҥ. Мин сытар ынаҕы туруорбат сымнаҕас майгылаахпын.

Кыыллар. Үтүө киһи үгүс доҕордонор, киир, киир.

Кэпсээнньит. Бу олордохторуна, бөрө кэлэр.

Бөрө. Дьиэ-дьиэчээн, ким эйиэхэ олорор?

Кыыллар. Мин Хороонньут Кутуйахпын, мин бах-бах Баҕабын, мин Куттамсах Куобахчааммын, мин Саһылчааммын. Онтон эн кимҥиний?

Бөрө. Мин Бөрөчөөммүн. Миигин дьукаах ылыҥ. Эһиэхэ суон дурда, халыҥ хахха буолуом. Тылбын тыалга бырахпат киһибин.

Кыыллар. Үтүө тыл баайдааҕар күндү, киир, киир.

Кэпсээнньит. Бу олордохторуна, эһэ кэлэр.

Эһэ. Дьиэ-дьиэчээн, эйиэхэ ким олорор?

Кыыллар. Мин Хороонньут Кутуйахпын, мин бах-бах Баҕабын, мин Куттамсах Куобахчааммын, мин Саһылчааммын, мин Бөрөчөөммүн. Онтон эн кимҥиний?

Эһэ. Мин Эһэчээммин. Миигин дьукаах ылыҥ, дьиэҕитигэр киллэриҥ.

Кыыллар. Эн биһиги дьиэбитигэр баппаккын.

Эһэ. Батыам, батыам! (Киирэ сатыыр).

Кэпсээнньит. Кыылларбыт ороҕун булбатах кутуйах курдук сүүрэкэлээтилэр.

Кыыллар. Баппаккын! Баппаккын!

Кутуйах. Истибэт! Кулгааҕар куба саахтаабыт быһылаах! (Сүүрэн тахсар).

Баҕа. У-у-уйабар уу киирдэ! Бах-бах-бах (куотар).

Куобах. Сүрэҕим айахпынан тахсаары гынна (тахсар).

Саһыл. Санаалаах татыма, өйдөөх мөлтөҕө буолан биэрдэ (тахсар).

Бөрө. Мэник топпутун сир уйбат! (Тахсар).

Дьиэни эһэ алдьатан кэбиһэр, кыыллар ытыыллар.

Кэпсээнньит. Ити курдук, кыылларбыт дьиэлэрэ алдьанан хаалар.

Кыыллар. Дьиэтэ-уота суох хааллардыҥ!

Эһэ. Кыыллар, кыыһырымаҥ! Бырастыы гынын! Саҥа дьиэ тутан биэриэм. Бары батар гына, улаханы.

Кутуйах. Алдьатар дөбөҥ-оҥорор уустук.

Баҕа. Көбүөхтүүрүн аанньа күөх киһиргэс!

Куобах. Мөҕүөх кэриэтэ сүбэлээбит ордук.

Саһыл. Сүгэ кыайбатаҕын сүбэ кыайар.

Бөрө. Үлэ үксэ, тыл аҕыйаҕа ордук.

Эһэ. Ойуурдаах куобах охтубат, дьонноох киһи тутайбат. Сэттэтэ кээмэйдээн үлэбитин саҕалыах. (Бэлэи дьиэни бары өттүттэн тутан киллэрэллэр).

Бары. Норуот күүһэ-көмүөл күүһэ!

Кэпсээнньит. Онтон ыла кыылларбыт бары бииргэ бэрт эйэлээхтик олороллор, дьиэлэрин уу иһэ-иһэ хайгыыллар.